Stemme: Coridon heeft seer triumphant.
O ! Suycker-soete goede min,
O ! min ghepast naer mijnen sin,
O ! onghetroubelt saligh minnen,
Die met volkomelijcke vreughdt
Mijn hert, mijn gheest, en all' mijn sinnen,
En t'saem' mijn ziele heel verheught.
2. O ! min, ghy hebt in d'eyghen vuer
(Gheblindt-koost van-der hellen gluer)
Vw' vlugghe veiren gansch versenghelt;
Dat ghy soo langh' ghestadigh zijt,
En uwen standt niet eens vermenghelt
Met vlucht, oft hert-terenden nijdt.
3. Ach ! 'k vrees den gulden somer-tijdt,
Om dat hy stormende ontglijdt:
Want als de langhe schoone daghen
Een lutjen hebben hier verbeydt,
Dan siet-men dobbel-sture vlaghen
Voor sulcken korte schoonigheydt.
4. Dus vrees' ick liefde uwen standt:
Want 't schijnt uw' stilte sinckt van kant,
En ick ghevoel een tranigh' duchten
Dat my iet droefs te segghen dreyght,
't Bly-zijn eylaes ! verruylt in suchten,
Waer van mijn liefd' ontgheest ne'er-seyght.