Oder Lieb wahrer hort vnd port Jhr meiner schönen Myrten augen Wan anderst ein so schlechtes wort Kan euch zu nennen gnugsam taugen!
Zwar augen kan man euch weil jhrem angesicht Jhr klare augen seit zu sein verläugnen nicht: Doch darff man euch kaum augen nennen Weil jhr so schön vnd tugenthafft
Sondern von wegen ewrer krafft Muß man euch himmelisch bekennen. Zwar mit so wunderreichem pracht Damit sich diese augen zieren
Kan (es sey gleich tag oder nacht) Der himmel selbs niemahls prachtieren: Wan schon dem himmel gleich jhr haitter glatte stirn Erleuchtet dise welt durch Euch als ein gestirn:
So ist jedoch in euch vermischet Das braun vnd liecht mit solchem schein Daß es ja muß ein wunder sein Wie jhrer jedes Vns erfrischet.
So darff auch mein warhaffter mund Euch mit der Sonnen nicht vergleichen Weil jhr glantz (wie dem Vmbkraiß kund) Muß ewerm glantz vnd würckung weichen:
Vnd zwayer Sonnen schein bedeutet krieg vnd layd Da ewer Zwilling liecht erwöcket frid vnd frayd; Die Sonn durch jhre brunst beschweret Die sie anschawen mit verdruß:
Da jhr mit süssem lusts einguß Durch das gesicht das hertz versehret. Wer sich (glickseelig) kan in Euch Besehen wirt reichlich gesegnet
Dan jhr gantz wunderlich liebreich Sein hertz mit frewden vberregnet. Die strahlen ewers liechts vnd ewers anblicks glantz Seind zugleich der Lieb pfeil vnd auch der keuschheit
schantz; Dan Sie mit lieb vnd lust entleben Vnd dan mit süsser forcht vnd ehr Widrumb belebend Vns die lehr
Den Engeln gleich zu leben geben. Daher O augen braun vnd klar Schwartzlecht vnd hell wie plitz vnd dunder; Der Schönheit vnd Lieb wieg vnd bahr
Der Natur schatz vnd gröstes wunder Gantz vbermenschlich schön muß ich mit layd vnd wohn Bekennen Euch zugleich der Götter straff vnd lohn:
Dan jhr könt ja mit ewern blicken (der Schönheit Lieb vnd Tugent sitz) Wie durch geschütz hitz spitz vnd plitz Das hertz zerstücken vnd erquicken.
Cookies on Poetry Cove