An Schön vnd Rawheit kan man euch
O Myrta keine Nymff vergleichen:
An Lieb ist mir auch keiner gleich
Vnd an Trew will ich keinem weichen:
Dan hertzen haben wir von stein
Wie Myrta möniglich mag sehen
Ich außzustehen solche pein
Jhr meine pein nicht zu verstehen.
Dan wir ja längst ohn widerstand
Beed weichend weren vberwunden;
Jhr Myrt von meiner Lieb bestand
Ich von vnzählich schweren wunden:
Also daß die selbs stöck vnd stein
Die zu halßstarrig vns nicht sehen
Mich auß zustehen solche pein
Euch solche pein nicht zu verstehen.
Gantz steinin ist gewiß mein hertz
Gequälet stehts euch stehts zu lieben:
Das ewrig auch dieweil mein schmertz
Euch (gnadloß) gar nicht kan betrüben:
Also muß man vns beede stein
Ja harte felsen sein wol sehen
Mich wegen grosser lieb vnd pein
Euch meine pein nicht zu verstehen.
Ich hab beständig meine trew
Alßbald Ich Euch sah Euch geschworen:
Bey Euch beständig stoltz vnd frey
Ist all mein laid vnd lieb verloren:
Daß also ich an trew ein stein
Vnd jhr an stoltz ein felß zusehen;
Ich ohn ablaß so schwere pein
Jhr mein laid ohn laid außzustehen.
Wan dan O felß an härtigkeit
Mein weinen Euch nicht kan erwaichen:
Wan ich felß an beständigkeit
Durch vndanck nicht kan tods verblaichen;
So seind wir ja zween harte stein
Ich solche marter außzustehen;
Jhr ewer macht vnd meine pein
Vnd vnsern verlust nicht zu sehen.