Die Natur hat ein jedes thier
Mit sonderbarer gaab vnd zier
Sorgfältiglich so wol versehen
Daß jhrer jedes mag (billich
Vernüget) dessen rühmen sich
Vnd neben andern wol bestehen.
Ein horn dem Einhorn auff das hirn
Dem Stier zwey hörner auff die stirn
Dem Hirsch ein geweyh ist gesötzet:
Die Vögel hat sie durch den flug
Vnd die Füchs mit list vnd betrug
Zu jhrer sicherheit ergötzet.
Der Fisch kan schwimmen vnd das Pferd
Ist wegen guten hufs mehr wehrt
Die Löwen haben zähn vnd klawen;
Das lauffen ist der Hasen pfand
Der Man hat götlichen verstand;
Was haben dan die zarte Frawen?
Die Frawen seind mit der Lieb pracht
Vnd mit der Schönheit höchsten macht
So vnvermeydenlich gezieret
Daß jhr holdseelige gestalt
Allein regierend ohn gewalt
Vber die hertzen triumfieret.