Ode.

Wje vnverhinderlich ein Jahr Schnell nach dem andern dahin fliehet! Wie vnempfindlich vnser haar Sich graw zu färben nicht verziehet!

Vmbsunst die Frombkeit selbs die stirn Von rüntzeln vnd von sorg das hirn Zu freyhen sich bemühet. Lauff alle tag der Kirchen zu

Vnd dien dem der allein Allmächtig; Vnd ohn erquickung nahrung ruh Erweiß dich tag vnd nacht andächtig Vnd Christlich: So wirt endlich doch

Das vnvermeidenliche Joch Des Tods auch durch dich prächtig. Die sünd die alle menschen gleich Gemachet machet sie fortgehen

Vnd lasset weder arm noch reich Sich länger spreissen vnd stillstehen: Ein Juncker Herr Graff vnd Monarch Wirt wie ein baur mit einem sarch

Vnd einem grab versehen. Vmbsunst der forchtsam für ein weil Dem Meer dem Krieg der Pest entfliehet Dan ja der Tod der dan in eyl

Dan langsam ist nicht lang verziehet: Gleich ist jhm der klein vnd der groß Vnd der gewafnet vnd der bloß Der welck vnd der noch blühet.

Vmbsunst sich setzet vngedult Forcht vnd geheul dem Tod entgegen: Es muß ein jeder dise schuld Auff die bestimpte zeit ablögen:

Nichts kan den Tod vnser geschlecht (von staub vnd aschen ein gemächt) Zu sparen je bewögen. Da müssen wir dan alles gut

So wir begehret vnd erfassen Was vns mit hochmuht vnd vnmuht Jemahls zu lieben vnd zu hassen Beliebet mit dem lieben leib

Hauß hoff spil kurtzweil kinder weib Vnd freind dahinden lassen. Hat einer (nichts mehr dan gestanck) Verlassend alles dan beschlossen

Erfolget dafür schlechter danck Vermischet mit spot schmach vnd bossen; Wan Er errungen vil alhie Für andre leut mit sorg vnd müh

Vnd (Narr) selbs nicht genossen.