Der Schäfer Filodor hat schon durch seine tugent
Durch seine lieb vnd trew die ehr vnd lehr der
jugent
Der Lieblichkeit gestirn der holdseeligkeit blum
Der Zucht vnd Keuschheit form vnd aller Schön-
heit Ruhm
Der Insul Albion wohn vnd Cron so bewöget
Daß andrer Schäfer dienst vnd lieb sie beygelöget:
Vnd wie Er
So sagte Sie nun jhm
Als Er mit Corydon den Cloris hielt gefangen
In jhrer haaren strick zu jhnen kam gegangen.
Daher als Myrta nu vnd Filodor mit lust
Empfunden gleiche hitz vnd lieb in jhrer brust
(wie Cloris anders thails wolt stoltz vnd hart eh
sterben
Dan daß Er Corydon solt jhre huld erwerben)
Sprach Myrta Filodor gantz glicklich ist dein
gang
Dieweil (wie Ich verhoff) du vns nu ein gesang
Mit Corydon der auch wol singen kan wilt lehren.
Er der nichts dan was Sie begehret kan begehren
Beredet Corydon der von dem angesicht
Darinnen seine sehl sich kan abwenden nicht
Sich zu den Nymfelein mit jhm alßbald zusötzen
Vnd (wan es möglich wer) Sie vnd sich zuergötzen.
Da alßdan Filodor auß grosser lieb vnd fraid
Da alßdan Corydon auß grosser lieb vnd layd
Durch ein schier gleiches lied doch mit vngleichem
willen
Fieng an auff dise weiß der Myrt bit zu erfillen: