Hjezwischen gienge mit verlangen
Die gantze Churfürstliche stat
Da der Neckar den anfluß hat
Jhr liebe Fürstin zuempfangen;
Welche mit grossem pomp vnd pracht
Vnder vilen Fräwlin gefahren
Leuchtet wie in Nymphischen scharen
Diana in der hellen macht:
Von perlen vnd edelgesteinen
Jhr haubt vnd jhre klaider scheinen
Doch gläntzet jhre schönheit mehr
Vnd ist sie selbs jhr gröste ehr.
Gleich wie auch jhr liebliche Jugent
Schimmert in einem guldin stuck:
Also Ehr Gotsforcht Zucht vnd Tugent
Seind jhrer sehlen wahrer schmuck.