Weil Ich nicht mehr die Zeit
Nach langem layd vnd streit
Verzweiflend kan vertreiben
So muß Ich Cloris schreiben
Die zeugnuß meiner beut;
Dieweil ich nichts erworben
Von Euch dan hassz zu lohn
Bin Ich hie Corydon
Auß lieb vnd layd gestorben.
Alßdan der arme Hürt beschliessend seinen mund
Sunck mit dem haupt gantz blaich vnd sprachloß zu
dem grund;
Als Cloris solches sah wolt sie gar nicht verziehen
Sondern fieng an davon schnell wie ein Reh zu
fliehen
So voll zorn stoltz vnd hassz Als Sie den Filodor
Vnd seine Myrt verliessz voll lieb vnd lust zuvor
Vnd voll verwunderung jetz vnd als voll des tods
zaichen
Sie sahen Corydon auß lieb vnd layd verblaichen
Vnd sterben wa sie nicht mit fleiß mit trost mit
macht
In seinen schwachen leib den gaist zu ruck gebracht.