Wjr kommen nicht hieher Vns selbsten vil zu
rühmen
Oder durch frembde sprach die warheit zuverblüme
Als ob wir kämen her auß einem End der Welt
Oder wider belebt von Elisischem Feld.
Nein. Teufel seind wir nicht noch Risen noch halb-
Götter
Noch Helden noch Wildleut noch vnsers Lands
verspötter;
Das edle Teutsche Reich ist vnser Vatterland
Teutsch seind wir von geburt von stammen hertz vnd
hand;
Was dient es frembden preiß vnd Namen zu ent-
lehnen?
Teutschland bedarff sich nicht mit Außländern be-
schönen:
Wie dan die welt wol weist daß Teutschland alle zeit
Hat leut fürtrefflich gnug zum friden vnd zum streit.
Darum̃ ob wir wol jung nicht sonders vil erfahre
Begehre wir doch nicht die haut noch faust zu spahre:
Sondern erscheinen nur in vnser Teutschen tracht
Mit redlich-Teutschem muht vmb vnser erste macht
An disen Rittern hie (die so hoch triumfieren)
Jhrer begird gemäß gewafnet zu probieren;
Verhoffend zweifels frey daß dise erste prob
Vollendend jhren ruhm anfangen soll das lob
So man von nunan wirt durch die straich vnsrer
wöhren
Vnder dem Firmament täglich erschallen hören.