Glickseelig bin ich wol weil sie mir jhre hand
Hand vnsers vertrags zeug vnd vnsers fridens
zaichen
Auch jhrer gunst vnd lieb vnverwürfliches pfand
Numehr nach meinem wunsch zu küssen will
darraichen.
O hand die du zuvor mein hertz mit taussent straiche
Gefoltert du bist nu für meine wund ein band;
O hand ab deren schnee man mich oft sah ver-
blaichen
Zuvor ein brad der lieb du bist nu mein wolstand.
Wan du dan so wol kanst beleben vnd entleiben
Vnd kanst den Göttern selbs der Lieb vnd Ehr
gesatz
Fürschreibend frewd vnd layd mitthailen vnd
vertreiben:
So schwör ich dir O hand ich schwör bey disem
schmatz
Du sanfftes helfenbein solt fürhin stehts mein
schatz
Vnd meines lebens hand band brand pfand
wolstand bleiben.