Daß auß vndanckbarkeit oder auß mißverstand
Sie mein lob lieb vnnd layd als einen schimpf
verlachet
Ist mir nicht wunderbar; Dieweil des himmels
hand
Sie also raw als schön zu meiner qual gemachet.
Vnd daß nach dem verlust ohn alles gegenpfand
Von seiner hofnung traum mein gaist noch nicht
aufwachet
Ist mir kein wunder auch: Dan meines gaists
bestand
Verliebet sich in dem was sein laid verursachet.
Das aber ist mir frembd daß jhr so schöner mund
Die deren hertzen Sie durch jhre blick versehret
So leichtlich lehren kan der hitzigsten lieb grund.
Dan alle meine witz mit wunder wirt beschweret
Wan Sie so schnell vnd wol das was jhr selbs
nicht kund
Was Sie nicht lernen will die dolleste köpff lehret.