Ung Harald til gilde stemnde
ein glitrande jolekveld;
paa Hadeland pynta var stova
med skjold yver krota tjeld.
Der raaka han Ragna rike,
ein erving til Toten og Land.
Ho tryllte hans unge hjarta
og kveikte hans sinn i brand.
Og Ragna dei ordi mæltø,
daa Harald sin hug bar fram:
Meg femner den svein som raader
yv Norig fraa tram til tram –.
Ung Harald seg budde til herferd
og fylka dei beste menn.
Hans hjarte for storverk bankar,
og blodet i aadrom brenn!
Naar øksar og spjutoddar blinka
og striden gjekk kvass og varm,
stod Ragna der ljos og mana,
med syljur paa rundlagd barm.
Ho vigsla hans samlingsyrke,
ho eggja med heite ord,
ho kysste hans sveitte panna
ved slaget i Hafursfjord!
Stig fram att ung Norigs Ragna,
du nemnest vaar fridoms møy –
og mana til strid ung Harald, –
send herpil til ytste øy!
Set staal i den unge fylking,
naar hugen vert trøytt og saar,
so uppatt me reiser oss yngde
og fram under merke traar!
Syn fram mot eit nyreist Norig,
nør striden med manande ord,
til eingong du kysser vaar panna
ved slaget i Hafursfjord !