Tunge næter, triste dagar,
stormen vilt i lufti jagar,
svarte skyer, tott fyr tott,
sunderrivne,
heimlaust drivne
flyr mot sud den lange nott.
Snjoen piskar, stormen tutar,
soper berr dei kalde nutar,
vilt gjeng sjøen i sin gong,
kvit i haaret
synger aaret
atter paa sin svanesong.
Stundom lell eg himlen skimtar,
stjernor gjenom skyi glimtar,
der, i deira sæle heim,
stormen kviler
allting smiler
i ein ævig solareim.
Naar igjenom hugen vankar
jagne, sunderrivne tankar,
tidast skodda rivnar lell, –
voni vinkar,
sorgi minkar,
all mi lagnad vert so sæl.
Kann dau elsk til verdi bera,
fast ho synest arm deg gjera,
kjærleik vil som stjerneskin
klaara vegen,
so du fegen
ser i verste røynsla inn.
Livet hev sin eigen lagnad,
sorgi sjølv kann hava fagnad,
attum skyi stjernor lær,
tunge dagar
sjølv ein lagar,
naar ein hat til livet ber.
Lat eingong, naar soli glader
fyr min livsdag, Gud og fader,
dine stjernor lysa meg,
lat i kvelden
stjerneslden
syna vegen heim aat deg!