Op de wijse: VVilt nu al, &c. IOnghe Ieught, al u vreught Moet zijn Godt te vreesen, Dus schickt u in desen Te zijn naerstigh bereyt, En u van 't boose scheyt, V gheneught, Laet in deught By de vrome wesen, Met Gods Woort te lesen, Dat u te rechte leyt, En so zijn eer verbreyt, Laet hart en zinnen Gods Woort beminnen, Van dat ghy krijght verstant,
Wilt vroegh beginnen, So sult ghy vinnen Van alles abondant, Dat u radt Op het padt Sal kunnen gheleyden: Tot die Stadt Vol met schat, Die Godt gaet bereyden Die van 't quaet scheyden, En troost verbeyden.
V ghemoedt Iaeght na't goedt, Van u Kindtsche daghen, En soeckt te behaghen Den Heere groot van kracht, Met yver, en aendacht, Valt te voet, Met waer' boet, Bidt sonder vertraeghen, Wilt dien u noodt klaeghen Die van alles heeft macht,
En hulp van hem verwacht, Hy is seer goedigh, Tot toorn lanck-moedigh, Gheneghen tot ghenaedt, Is oock behoedigh, En vergheeft spoedigh, Wiens hope op hem staet, Dus met vlijt Van u smijt 't Gheen zijn Wet is teghen, Maeckt u quijt Haet, en nijt, Treedt vroom op zijn weghen, Op dat zijn zeghen V leydt te deghen.
Doch wel let, Waer ghy met V hoort te versieren, Wilt u doch regieren Na Godes wil en raet, En treedt niet boven maet, Want Gods Wet
Leert ons net, Om met goed' manieren Ons weghen te stieren, En bewaren van't quaet, Dus volght dit t'uwer baet, Wilt uwe leden Met kost'lijck kleeden Versieren nimmermeer, Volght Petrus reden, Laet kuysche zeden Zijn u cieraet en eer, Hovaerdy, Weest party, Wilt pracht en prael schouwen, T' allen ty Wilt u by den ned'righen houwen, En met betrouwen Op Godts Woort bouwen
Dochter tracht Dach en nacht
Dat 't gheloof mach rijsen, En wilt eer bewijsen Christo u Middelaer, Op dat ghy voor en naer Werdt gheacht Van't gheslacht: Die zijn Name prijsen, En hebt een af-grijsen Van die u lockt van daer, Want 't is een Fonteyn klaer, Die daer staet open, Om uyt te koopen Melck ende wijn om niet, Wilt tot hem loopen, En in hem hopen In u noodt en verdriet, Door hem kan alle-man Behoedt zijn van sneven, Treedt vry dan Tot hem an, Met suchten, en beven,
Wan hy kan gheven Het eeuwigh leven.
Cookies on Poetry Cove