Op die wijse: Laet ons den Heer loven, van al dat hy ons doet. GAet u t'samen vermeyen Al die den Heere vreest, In Syons lieffelijcke schoon Valleyen, Die bedout zijn met 's Heeren Gheest, En daer de beste Vruchten leest.
Reyn Liefde boeyt daer schoone, Draeght Vruchten abondant,
Waere vrede staet daer altijdt ten toone, Door het recht Gheloof gheplant, En brengt haer vrucht aen elcken kant.
In desen Boomgaert reene Men oock lydtsaemheyt voedt, Lanckmoedigheyt wast daer ooc in 't ghemeene Op de struyckjens van waer boet En baert haer vruchten door ootmoedt.
Eere en trou te samen Vindt men daer menighfout, De waerheyt en de deughde nae 't betamen Men over-vloedigh daer aenschout, En matigheydt zijn plaets daer hout.
Treedt sonder langh beraden In dit schoone Prieel, Wilt zijn vruchten doch nimmermeer versmaden, Want zy zijn kostelijck en eel, En doen verkrijghen 't beste deel.
In dees schoone Lant-douwen Leydt men gheen haet of nijt, Want soo haest als men die daer gaet aenschouwen Moetens' de Baen ruymen altijt, Of anders zy die vreed' verblijt.
Als 't komt dat haer ontdecken Hoogheyt of Heerschappij, So moeten zy stracks wederom vertrecken, Want zy zijn die ootmoet party, En brenghen 't volck tot raserny.
Niemandt en moet daer zaeyen Twist, tweedracht, of discoort,
Want daer boor ziet men 's Heeren Woort verdrayen, Daer door den Boomgaert wert verstoort, En menigh honderdt Ziel vermoort.
Stanck, noch onreynigheden, Moet niemandt draghen hier, Want sulcks en magh aldaer niet zijn gheleden, Maer uyt-ghehouden goedertier, Door last vanden Wijngaerdenier.
Doet daerom naerstigheden Ghy Christenen alt saem, Om suyver en reyn te houden u Leven, Op dat ghy mooght werden bequaem In desen Hof, met een goede naem.
Op dat ghy daer mooght plucken De beste vrucht met lust,
En soo daer door op-wast in allen stucken, Die u voeren tot d'eeuw'te rust, Hier in al u begheer en blust.
Cleyn, en need'righ van leven, Krijght daer den besten lof, Want den need'righen werdt den prijs ghegheven Van den Heere van dese Hof, Dus zijt hier in luy, traegh, noch slof.
Hoe hoogh ghy zijt gheresen Al in des Menschen oogh, Wilt doch in alles te need'righer wesen, En staet doch gheenes-sins nae 't hoogh, Want hooghe moedt gantsch niet en doogh.
'T en sal u niet faljeeren So ghy vollight ghetrou
Die voet-stappen van Christ den Heer der Heeren, Het zy in blydtschap, of in rou, So sal staen blyven u ghebou.
Een dinck is noch mijn beden, Ziet dat ghy daer op let, Dat is: dat ghy voor den Heere wilt treden, En storten vyerigh u ghebet, Dat hy u Vleysch in Gheest omzet.
Reyn van hart, en ghemoede Verschijnt voor uwen Godt, Op dat hy u van alle quaedt behoede, Ende toe-schickte 't beste lot, Dit wensch ick u hier meed' in't slot 't Mist wel meer.
Cookies on Poetry Cove