Oll Stein tau Lüssow hadd so'n schönen Klewer,
Doch ein verdammte Postelljon,
De fährt em ümmer langs heräwer.
Hei ward nu up den Kirl mal luren –
Un richtig! kriggt ok den Patron.
Un as hei'n bi den Wickel hett
Un em nu in den Bussen fött
Un mit den Stock em will traktieren,
Dunn seggt de Kirl: „Weg mit den Stock!
Dit is den Großherzog sin Rock,
Den möten S' an mi respektieren.“
Dunn seggt oll Stein: „Entfamte Snäsel!
Meinst, ick wir so en dummen Esel,
Dat du mi bringst in Schücheri?
Ne, in de Snut kriggst eins von mi,
Un de hürt di!“