Na de wijse: O vleysch quaedt van manieren.
VVAt mooght ghy mensche spreken
Van die Hemelsche vreught,
Daer u noch schijnt te ontbreken,
Soo veel wereltsche gheneught?
Hoopt ghy op't eeuwighe rijck,
Waerom soeckt ghy dan ghelijck
Noch altijdt meer dreck en slijck?
Wilt ghy met Christo vermeyen,
Hoe vreest ghy dan noch die doodt,
Die u daer haest conde leyen,
En helpen uyt alle noot?
Of wilt ghy ten hemel gaen,
Waerom sijt ghy noch belaen
Met so veel sonden en quaen?
Begeert ghy mede te wesen
Al op des Lams bruyloft breet,
Waerom voeght ghy u tot desen
Niet met een reyn Bruylofts cleet?
Sijt ghy met de Schepper een,
Waerom sijt ghy dan te vreen
Met het schyesel in't ghemeen?
Hebt ghy met Paulo verlanghen
Al na het Hemelsche huys,
Waerom sijt ghy dan noch so bange
Te scheyden uyt aertsch ghedruys?
Soeckt ghy nieu Hemel en eerd,
Hoe is dan d'oude soo weert
En van u soo seer begeert?
Ghy moet het Hemelsche smaken,
En niet het aertsche goet,
V selven gheheel versaken,
Door 't gheloof in ware boet,
So sult ghy des Hemelsch croon,
Ontfanghen tot uwen loon,
Door Godes ghenade schoon.
Na beter.