Op de selve wijse.
WY dancken u o lieve ende weerde Heere,
Dat ghy ons met u heyligh woort en leere
In't Avontmael door u Dienaer bequaem
So rijcklijck aen siel en lichaem doet spijsen,
Des willen wy u eeren, loven, prijsen,
Ende groot maken u heylighe naem.
Ons hert en siele wy tot u opheven,
Want ghy hebt ons u lieve Soon ghegheven,
Tot hulp, troost heyl ende salicheyt,
Waer door ghy ons soo lieffelijck gaet voeden,
Door't gheloove met sijn vleysch ende bloeden,
V lof, en eer moet eeuwigh zijn verbreyt.
Ghy Hemelen aerde en alle nacy,
Helpt ons uytroepen Godts lof, eer en gracy,
Die ons na der sielen versadet mee,
Wie can sijn groote weldaden uytspreken?
Hy voet, gheneert, en heelt al ons ghebreken.
Looft hem alle ghelijck, en gaet in vree.
Na beter.