Na de wijse: Van den 50. Psalm. Den vierden Boet-Psalm. GOdt zijt my ghenadigh na u goedtheydt, Ende doet mijn sonde uyt in dit leyt Na uwe groote barmhertigheydt, Ia Wast my, Heere, wel van mijnder misda, Ende reynight my oock van mijnder sonde: Want ick bekenne mijn misdaedt goetronde. En mijn sonde is alle tijdt voor my, Aen u alleen heb ick ghesondight vry En quaedt ghedaen, op dat ghy 't recht behoudt, In u woorden, en reyn blijft aen het hout, Wanneer ghy gherechtet wordt, Heer verkoren: Want ick ben uyt sondelijck saedt gheboren.
En mijn Moeder heeft my in sond ontfaen, Siet ghy hebt lust tot de waerheydt voortaen Die in't verborghen leyt, en ghy laet my Weten de heymelijcke wijsheydt bly, Ontsondight my met Ysoop in't ghemeyne, Wast my dat ick sneeu wit wordt ende reyne. Laet my hooren verheugingh en blijtschap, Dat de benen vrolijck worden vol sap, Die ghy in stucken gheslaghen hebt Heer, Verberght u aensight van mijn sonde veer En doet uyt alle mijn sware misdade, Schept in my Godt een reyn hert vol ghenade. En gheeft my een nieuwe ghewisse gheest Verwerpt my niet van uwen aensicht meest, Neem uwen heylighen gheest van my niet, Troost my weder met uwer hulpe siet, De vrymoed'ghe gheest onderhoudt my deghen Want ick wil den overtreders u weghen Leeren, dat de sondaer tot u bekeer. Verlosset my vande bloed-schulde Heer, Ghy die mijn Godt en Heylandt zijt, dat mijn Tongh u gherechtheydt roeme, Heer doet fijn.
Mijn lippen open, dat mijn mondt in ruste V roem verkundighe, ghy hebt gheen luste Tot offerhande: want ick woudse u Anders wel gheven, en brandt-offer ru Behaghen u niet, d'offerhande meest, Die u behaeght, zy een beanghsten gheest, Een beanght en verslaghen herte yverigh En sult ghy, o Godt, niet verachten tierigh. Doet wel aen Sion nae dijn ghenaed' ree, Timmert de mueren Ierusalems dree, Dan sal u behaghen de offerhandt Der gherechtigheydt, den brandt-offer cant En den gantschen offer, dan salmen varren Offeren, Heer, op u recht Altaren. Na beter.
Cookies on Poetry Cove