Na de wijse: Ionckvrouwe ick u vraghen laet.
Thuw'lijck dat is een staet gheplant
Van Godt in't Paradijs,
Met man en vrouwe goeder hant,
Gherechtich vroom en wijs,
Thouw'lijck is goet
Die 't in Godt doet,
En voltreckt tot Godts prijs.
Thuw'lijck dat vanght met Adam aen,
Godt voeght hem toe een Wijf,
Wt sijn ribbe soo wy verstaen,
Als hy lach en sliep stijf,
Thuw'lijck is goet,
Die't in Godt doet,
Twee sielen maer een lijf.
Thuw'lijck dat is ghebenedijt
Van Godt den Heer bedacht,
Om te vermeeren, metter tijdt,
Het menschelijck gheslacht,
Thuw'lijck is goet,
Die't in Godt doet,
En op sijn saken acht.
Thuw'lijck dat is een goet gespan,
Met liefden ende min,
Hout u oprecht en vroom daer an,
Het gheeft seer groot ghewin,
Thuw'lijck is goet,
Die't in Godt doet,
Met een lieffelijck sin.
Thuw'lijck is een eerlijck streeck
By Godes Heylighen al,
Het sy den Priester ofte Leeck,
Elck een tot sijn gheval,
Thuw'lijck is goet,
Die't in Godt doet,
En blijft in sijn schaep-stal.
Thuw'lijck wort van Chriso ghe-eert
Al tot Canain fijn,
Tot Godes lof, het volck en weert
Maeckt hy water tot wijn,
Thuw'lijck is goet,
Die't in Godt doet,
In hem wilt vrolijck sijn.
Thuw'lijck en is te scheyden niet
Dat van Godt is ghepaert,
Daerom alle beyde toesiet,
Dat elck nae aer veraert,
Thuw'lijck is goet,
Die't in Godt doet,
Levende lief en waert.
Na beter.