Na de wijse: 'Tis nu by na twee jaer verstreken. HEer Iesu ick wil geern plaseeren Met u in mijn inwendigheydt, Meught ghy een wynigh tijts omberen My te vertelschappen planteyt, 'Twaer mijn begeer, Het doet my seer, Dat veel ghepeynse in't hert gheraeckt, My u vermaken soo veel ontschaeckt. Drijft van my veel sware ghedachten, En al wat voort hinderlijck is, Dat ick alleen u Heer verwachte, In mijn hert en ghemoet ghewis, Plant uwen min, Soo in mijn sin,
Dat daer niemant meer in en magh, Ick begeer u nacht ende dagh. Wanneer sult ghy mijn lust versaden, En mijn begeerten tot u voldoen, Ick ben met uwen min beladen, V lieve soete aenschijn groen, Is mijn vermaeck, O Heer comt vaeck, In mijn ziel en inwendigheydt, Maeckt die plaets na u wil bereydt. Heer u te beminnen is mijn vreughde, Aen niemant hechten mijn ghemoedt, Al mijn soetigheydt en gheneughde, Wil ick stellen in u ootmoet, Ghy zijt mijn boel, 'sWerelts ghewoel, Is my gheen vreught, maer slechts verdriet, Op dat ick u alleen gheniet. V soet ghehoor boven musijcke, In't proeven boven alle smaeck, V luste is gheen dingh ghelijcke, Gheen soetigheydt mijn herte raeckt, Als u o Godt, Mijn deel mijn lot, My noch veel nader t'uwaerts treckt,
Mijn leven te leyden perfeckt. Waer dat ick ga waer dat ick keere, Mijn herte volght u altijdt na, V selschap is mijn vreughd' en eere, Blijft my doch by vroogh ende spa, Ghy zijt mijn vreught, Mijn eer, mijn deught, V schat te erven dat soeckt mijn hart, Maer u te derven, dat is mijn smart. Och mocht ick u ghenoegh aenhanghen, En van u vast omghehalst zijn, Leyt, stiert, regeert al mijnen ganghen, Al na die lieftse wille dijn, Als ik u vind, En ghy my bind, Met u in een hert en ghemoet, Het is soeter dan honigh-vloet. Mijn ziel en heeft hier ghenen rusten Sonder u teghenwoordigheydt, Tot u soo treckt mijns hertsen lusten, My in u wijnkelder gheleyt, En schenckt my in, Meer van u min, Want seer verheughlijck is u smaeck, En seer gheneughlijck met vermaeck.
Waer ghy u went wil ick my keeren, En volghen u dicht achter an, Ghy zijt mijn Leer-meester en Heere, Die wegh, die waerheydt en leydts-man, Doet u gheval, Ghy zijt het al, Mijn ziel verlanght nae 't Hemels schat, Och of ick dat volmaeckt besat. Na beter.
Cookies on Poetry Cove