Na de wijse: Vanden vijfden Psalm.
EEn kindt dat den Heere wil vreesen
Dat moet eeren de ouders fijn,
Ghelijcken als den Heere fijn,
Met woorden en wercken ghepresen
Alsoo wy lesen.
Weynigh woorden, eerbare seden
Van de Ionckheyt seer wel betaemt,
Dat u ouders niet sijn beschaemt
Al deur u onmanierlijckheden,
Of ydel reden.
Neemt waer u tongh om die te leyen
Nae lieffelijcke woorden soet,
Beleeftheydt is kinderen goet.
Met quaet gheselschap niet vermeyen
Noch veel klappeyen.
Als u ouders u tot goedt porren
Soo weest daer toe altijdt bereydt,
'Tgeen dat u van haer wordt gheseyt
Doet vlijtelijck al sonder morren
Of eenigh knorren.
Ten staet niet fijn al vande kind'ren
Dat sy niet hooren d'ouders stem,
Draeght u gheschicktelijck en tem,
Deur weder wil laet u niet hind'ren
'Tgoet nae te vlind'ren.
Al die eerlijck begeert te leven
Voor Godt en oock der menschen schaer,
Die moet eeren Moer ende Vaer,
Onder ghehoorsaemheyt begeven
Niet teghen streven.
Oorlof Dochters en Iongelinghen
Elck geern altijdt de minste wert,
Een vernedert en vreedtsaem hert,
Geef u de Heer in alle dinghen,
Mijn susterlinghen.
Na beter.