Na de wijse: Van den 79. Psalm. Den vijfden Boet-Psalm. LOoft den Heer mijn ziel, en al wat bequame In my is, met een looft sijn heyl'ghe name, Looft den Heere, mijn ziel, wilt niet vergeten
Wat hy my al goets ghedaen heeft met weten, Die u sonde vergheeft, Heelt u ghebreck beleeft, V leven van't verderven, Verlost en u kroon bereydt Met ghenaed' en goetheydt Die uwen mondt in't swerven Vroolijck maeckt, dat ghy vernieut wordt met reden Als een Arendt, Godt doe gherechtigheden Al die onrecht lijden, hy heeft sijn weghen Moses laten weten om recht te pleghen Oock Israel sijn doen, Barmhertigh en volsoen Is de Heere verduldigh, Van grooter goetheydt loos, Hy en kijft niet altoos, Toorent niet eeuwighvuldigh. Hy handelt niet met ons na onse sonde En vergelt ons niet na onse misdaets gronde, Soo hoogh als is den Hemel boven d'aerde Laet hy sijn ghenade worden waerde Over dien die hem vreest Soo veer het oost is meest Vanden westen verscheyden
Soo laet hy ons misdaedt En overtredingh quaedt Van ons zijn sonder beyden. Ghelijck hem een Vader ontfermt sijn kind're Soo ontfermt hy over die hem vrees'ind're: Want hy kent wel wat wy voor een werck zijne, Hy ghedenckt daer aen, dat wy sijn stof schijne, Een mensche is doch pas In sijn leven als gras, Hy bloeyt ghelijck de bloemen Op't velt wanneer de wint Daer over wayt, soo vint Men haerder gheen meer roemen. Haer steed'is niet meer, maer des Heeren ghenade Duert van eeuwigheydt tot eeuwigheydt spade Over die hem vreesen sijn gherechtigheden Op kints kind'ren by de gheen die in vreden Sijn verbondt houden staen Ende ghedencken aen Sijn ghebode gheleydet Dat sy daer na doet snel, De Heer heeft sijn stoel wel Inden Hemel bereydet. Sijn rijck heerst over al, wilt den Heere loven,
Ghy sijn Enghelen stercke helden boven, Die sijn woort uytrecht, datmen hoort de stemme Sijns woorts, looft den Heer all' Heerscharen temme, Sijn Dienaren, ghy die Sijn wille doet soo rie, Looft den Heer al sijn wercken Aen alle hoecken vry Sijn macht ende heerschappij Looft den Heer mijn ziel stercke. Na beter.
Cookies on Poetry Cove