Na de wijse: 'Swinters Somers even groen. Ofte: O Heere Godt van grooter machte. MYn vrient Simon ick moet u schencken Een Liedt, gherechtet op u naem. Den eersten Simon wilt ghedencken, Den tweeden Patriarch bequaem, Waer deur d'Israelijtsche gheslachte Vermeerdert is soo menighfout. Wilt op dees navolghende achten, Die het Huys Godts hebben ghebout. Simon Onias Soon, den Priester, Stelt Sprach ons loflijck ten toon:
Sijn lof set hy op een register, En seyt dat sijn licht blinckte schoon, Als de Maen en de Morghen-sterre Door de Wolcken en als de Son Schijnt op des Heeren Tempel verre, Ghecleurt als den Reghenboogh don. Ghelijcken als de schoone roosen, En Wieroock-boom al inde May, En als de Lelien altoose Aen't water staen huys ende fray, Als de ontsteecken Wieroocks vaten, En ghelijck als een gulden juweel, Met edel ghesteente op maten, Verciert soo schoon sijn eer gheheel. Simon Matthias groot Vader, En Simon sijn Soon, een vroom helt, Wijs was hy en vercreegh te gader Priester en vorst te zijn in't velt, Wien datse mosten ghehoorsamen, Ter tijdt dat den rechten Propheet Van Godt verweckt worde bequame, Diemen nu Iesum Christum heet. Hy reynighde Ierus'lem mede, Die met Afgoden was beset, En recht op de Gods-dienstigheden,
Voerden het volck tot Godts wet. Sijn leven was voor haer ten besten In meen'ghe ridderlijcke daet: Hy brochte Israel noch ten lesten In rust en vreed' in goede staet. Een Simon, uyt Iudeen gheboren, Teelde vier Sonen in Israel, En Simeon Harims vercoren Scheyde hem nae Esdres bevel Al van de buytenlandtsche wijven, Noch een Simeon ick vernam, Wt wiens gheslacht, nae Lucas schrijven, Iesus, ons Salighmaker quam. Oock Simeon den ouden Vader, Godtvruchtigh en Godtvreesende, Quam deur 't beweghen des gheests nader Inden Tempel, al waer ter stee 'tKindeken Iesus is verschenen, Dat hy doen in sijn armen nam, En loofde Godt den Vader met eenen, Segghende, Heer, laet u knecht tam Na uwen woorde nu in vrede: Want mijn ooghen hebben ghesien V saligheydt, die ghy met reden Bereydt voor alle vollecken,
Een licht om de Heydens te lichten, Tot prijs uws volcks Israel, Een val en opstandinghe dichte Die wedersproken worden sel. Simon Petri, d'Apostel des Heeren, Met Simon Zelotes Cana, Des Heeren Broeder nae Schrifts leere. Oock leest men van Simon Nigher, Ia Een Propheet, Leeraer der Ghemeenten, Ghelijck als den anderen mee Lichten in Godts huys als ghesteenten Met Leer, Leven, Godsaliche. In Simon des melaetschen huyse Salfde Maria Christi hooft: In Simons des Phariseus cluyse Wiesch Maria met tranen ghelooft Ootmoedelijck des Heeren voeten, By Simon Leer-touwer ghenaemt Was Petrus ghelogiert seer soet, Die gast-vryheydt u oock betaemt. Simon van Cyreen onvergeten Heeft ghedraghen des Heeren cruys, Waer by ghy seeckerlijck mooght weten Om mee te dooghen sulck confuys: Want ghy zijt niet beter dan dese,
Die hier al tot exempel staen, Om haer doen, werck, leer en wesen Ghehoorsamelijck nae te gaen. Van Simon des Benjamiters daden Moet ghy u wachten alle tijdt. Helidorus woud door sijn raden Ten Tempel haer schat maken quijt, Hy wordt soo jammerlijck ghesmeten 'Twelck den valschen Simon met schandt Den vromen Oniam woud toemeten: Want hy was hem seer doodt vyandt. Oock van Simon den Tovenare Moet ghy u wachten, hoewel hy Op sijn gheloof ghedoopt wordt clare: Nochtans wast niet dat bitter ny Daer sijn hert mede was behanghen, Meende dat om schatten ghetelt Gods gheest een gaef was te ontfanghen, Petrus verdoemt hem met sijn gelt. Met oorlof, Simeon, u name, Of Simon, is soo veel gheseyt, Als een ghehoorsamer bequame, In de rechte ghehoorsaemheydt Wilt uwen naem te deegh betrachten, Op dat ghy met de Simons vroom
Godts goedtheyt, ghenaed meught verwachten In sijn eeuwighe eyghendoom. Na beter.
Cookies on Poetry Cove