Na de wijse: Daer reedt een Ridder uyt jaghen.
O Ionckheydt wilt aenmercken
Christi deughd'lijcke wercken
Al van sijn jonckheyt aen.
Hy wies op in oudtheden
Vol wijsheydt en kracht mede
Met Godts gracy omvaen.
Doen hy was twalef Iaren
Gingh hy met Moer en Vare
Op nae Ierusalem,
Om het Paesch-Feest te houwen,
Hy hoorde seer ghetrouwe
Al nae sijn ouders stem,
Hoewel hy daer-beneden
T' Ierusalem is ghebleven
Wt gheen vleyschlijcken aert.
Doen sijn ouders drye daghen
Hem sochten seer verslaghen,
Soo vonden sy hem waert,
Al na Lucas verclaren,
Inden Tempel by leeraren
Haer horende ghevraeght
Al die waren voorhanden
Verwondert van sijn verstande
't Antwoordt haer wel behaeght;
Sijn jonckheyt was aenghename
Voor Godt en Mensche bequame
Seer wijsselijck bedocht,
Sijn Moeder sprack met reden,
Soon, wy hebben u heden
Seer droeffelijck ghesocht.
Hy antwoorde op desen,
Wist ghy dat ick most wesen
Dat mijn Vader is reen;
Met oorlof van Christus songhen
Wilt hem, 'tsy ouden of jonghen,
Ghehoorsaem'lijck na treen.
Na beter.