Na de selve wijse:
ALle die den Doop nu hebben ontfaen,
Veel beloften tot u vertroostingh staen,
Wie ghelooft en doopt wort, sal saligh zijn,
Spreeckt Christus tot sijn Apostelen fijn,
Den Dienaer doopt met water goedertieren,
Maer Christus doop met den geest ende vyere.
Vergevingh der sonden wert toegheseydt,
Die haer nu tot den doop hebben bereydt,
Door't gheloove in Iesu Christi bloet,
Waer af die doop haer beteyckeningh doet,
Ghy sijt oock leden aen Christi lichame,
Ende rancken aen die Wijnstock bequaeme.
Ghy die hier voortijts geen volc Gods en waert
Sijt nu Godts volck al na Christum gheaert,
Tot den Bergh Sion ghy ghenomen sijt,
En tot't Hemelsche Ierusalem wijt,
Tot Godts ghemeente, en Hemelsche stede,
Houdt dat ghy hebt, ende gaet nu in vrede.
Na beter.