Na de wijse: Ick peyns om een persoone, Ofte: Christen Broeders verkoren. IOnckheyt wilt 'tHemels soecken Boven het aertsche goet, Wilt u eerstlijck verkloecken Te doen oprechte boet, Met waer ootmoet, in laegheyt leeft Ten heeft geen faem, maer tis bequaem
Die hem tot Godt begeeft. Die Godt van herten minnen, En soecken boven al, Het Hemelsche te winnen, Achten gheen aertsch misval, Al schijnt hy mal, in 'tswerelts staet, Alst niet gheluckt hy onderduckt, En ontfanght geeren smaet. Die alleen heeft voor ooghen Een onverganck'lijck rijck, Hoe can, hoe sal, hy pooghen Nae het verganckelijck? Dit goet is slijck, haer schoonheydt dreck, 'Tis maer een schijn, een cleyn termijn, Weest vry des werelts geck. Godt wil u van't hoogh stooten, Om u, met leyt en spot, Door cleynheyt te vergrooten, 'Tswerelts wijse sijn sot, Haer luste tot die ydelheyt Zy u verdriet haer wesen vliet, Tot ootmoet u bereyt. Wijckt en keert van het hooghe Nu ghy int laghe sijt, Daelt neder voor Godts ooghen,
Ghy wort namaels altijdt Verhoogt, verblijt, waer na toeft ghy, Daelt altijdt neer, tot Godes eer En verheft sijn glory. Ghy mooght niet tevens minnen 'tAertsch en 't Hemelsche goet, Alleen u hert en sinnen, Tot Godt opheffen doet, 'Twort al versoet, die't aertsch versaeckt, Laet tswerelts tol, rollen haer rol, Alleen het Hemels smaeckt. Is eersucht u bedrijven, Te sotter is u oogh, Die geern in't laegh wil blijven, Comt mackelijck in't hoogh, Maeckt gheen proloogh, uyt schijn ghelaet, Maer toont u schijn, soo ghy wilt sijn, Oprechtlijck metter daet. Ootmoet lieft boven allen, Want die op't laeghste leyt Heeft niet om af te vallen, Sijn rust is hem bereyt Hier gelt hoogheyt, noch gif, noch gaef, Wie niet vermeert, te veel hanteert, Is van sijn goet een slaef.
Wilt ghy wesen een Heere En Meester over al Soo wilt u selfs beheeren, Bedwinght u sinnen mal, Hebt geen gheval in't swerelts staet, Schout ydel spel, doet altijt wel, Voert een Christen ghelaet. Dit Liedt most ick u schencken Lieve Hoorensche Ieught, My hier by te ghedencken Als ick ben inde vreught Ick heb mijn veught, wel veertigh Iaer, V door Gods Woordt te leyden voort, Neemt die leeringh wel waer. Na beter.
Cookies on Poetry Cove