Na de wijse: Van den honder-en-derden Psalm. ALs Iesus onsen Heere was gheseten Met sijn Discipulen 't Paesch-lam te eten, So nam hy broot, danckte en bract gewis En gaf het sijn Discipulen bequaeme, Seggende neemt, eet, dit is mijn lichame,
Doet dit nu tot mijnder ghedachtenis. Hy nam den Kelck en danckte sijnen Vader, Gaf haer en sprack, drinckt hier uyt alle gader, Dit ist nieuwe Testament in mijn bloet Dat voor vele uytghestort wort, gort ronden, En dat gheheel tot vergevingh der sonden, Doet dit tot mijnder ghedachtenis soet. Siet ick sal nu voortaen niet drincken meere Van die vrucht des wijnstocks, tot uwer leere, Tot in dien daghe tot wanneer dat ick Dat nieu met u drinck in mijns Vaders Rijcke, En als sy den lof-sangh hadden ghelijcke Gesproken so gingen sy uyt gelick. Paulus spreeckt van 't Nachtmael tot de ghenoode Mijn liefste vliet van den dienst de afgoden, Als met den wijsen spreeck ick oordeelt ghy, De Kelck der ghebenedijdinghe waerlijck, Den welcken wy ghebedijen claerlijck, Ist niet die ghemynschap des bloets Christi. En 't Broodt dat wy breken , en ist niet mede Ghemeynschap des lichaems Christi in vrede, Wy vele zijn een broot en een lichaem, Want wy zijn alle eenes broots deelachtigh, Aensiet Israel na den vleysch aendachtigh, Die de offerhanden eten bequaem.
Sijn sy niet in't ghemeynschap der altare, Daerom soo segh ick u in't openbare Ghy en condt niet ghelijck drincken met vreen, Des Heeren en des Duyvles Kelck in desen, Gy en condt niet ghelijck deelachtigh wesen, Des Heeren en Duyvles Tafel met een. So dickwils ghy van dees Broode sult eten, En van desen Kelcke drincket met weten, Soo sult ghy spreken van 's Heeren door goet: Want wie onweerdigh eet van desen Broode, Of van den Kelck des Heeren drincket snoode, Is schuldigh aen 's Heeren lichaem en bloedt. Daerom so moet een mensch hem selfs proeven En soo eten van't Broot tot zijn behoeven, Ende drincken van desen Kelck bereydt, Want wie onweerdigh eet of drinckt, wilt ramen Die eet en drinckt hem selven 'toordeel t'samen, Want hy 's Heeren lichaem niet onderscheydt. Hier by moet ghy ooc goet onderscheyt maken, Tusschen teecken en beteeckende saken, Of u Gods-dienst is afgodery mis, 't Breken des Broots dat moet u te recht leeren, 't Ghebroken lichaem Christi te vereeren, Dat voor ons ter salicheyt ghecruyst is. Broot dat ghemeen, en eens is in sijn deelen,
Wil ons in Christo tot een lichaem heelen. Exempel aen d'eerst Apostelsche Kerck, Sy aten 't broot met eenvuldigher harten, Niemant seyt yet 'tzijn te wesen, met smarten, Want sy waren een hert en een siel sterck. Geeft Heer dat wy, na u goet wel behaghen, Christum ghecruyst in onse herte draghen, Laet ons smaken door den heylighe gheest, Die nieuwe mos die ghy belooft op trouwe, Als wy't Avontmael des Lams met u houwen, Hier na in u eeuwighe Lover-Feest. Na beter.
Cookies on Poetry Cove