Na de wijse: Het had een meysken een ruyter lief. Ofte: Wel hem die in Godts vreese staet. DIe Heere geef u vervuldigheydt, In al u smerte ende leyt, Mijn Suster in den Heere, Ghedult is lijdens eere. Waer ghedult 'therte te deghen raeckt, Ongheluck wordt gheluckigh maeckt, Wt doefheydt comt verblijden, Ruste volght na het strijden. Verduldigheydt is een willigh pack, Om te draghen het onghemack, Daer Godt mee comt besoecken, Van dese, of die hoecken. Ghedult wordt door't gheloof ghebaert, En in een vaste hoop bewaert, Sy doet wanhoop verteren, En verdrijft murmureren. Door gheen leet wilt te rugghe gaen, Ist groot, dringht des te stijver aen,
Ghy zijt in swaer benouwen, Wilt des te meer aenhouwen. Wie meest verdraeght, wie meest verwint, Sijt met Christo lijdens ghesint, Ghy sult oock triumpheren Met hem in volder eeren. Die mensch lijdt wel, die met eenvult Sijn lijden aflijdt met ghedult, Maer onghedult sal vaken 'Tlijden noch sweerder maken. Godts lieve Soon, 'tondschuldigh Lam, Die door den doodt, den doodt wech nam, Heeft door lijden en sneven 'Teeuwigh lijden verdreven. Met dees pilaer u onderstut, Die al u lijden maeckt tot nut, Hy is u voor ghetreden, Stelt u met hem te vreden. Denckt wat Godt wil daer moet ick aen, Veel liever geern als nood ghedaen, Geern lijden alsmen moeten, Dat sal den last versoeten. 'Tis eyghentlijck wat Godt oplecht, Gheen ongheval, maer slechts ghevecht Om ons beter te maken,
Door 't proeven in veel saken. Wanneer als ons treft teghenspoet, Wy achten 't quaet, God achtet goet, Alle druck sal hy in't lesten Noch wel keeren ten besten. 'tHeyl dat ghy soeckt en is hier niet, Wat oorsaeck dan van veel verdriet, God is met u in't lijden, Ghy met hem in't verblijden. Strijdt met lijdtsaemheydt inden druck, Want druck is d'ingangh van gheluck, Doch ick en hoor gheen claghen Over onlijdtsaem vlaghen. Maer ick hoop dat u Godt bereydt Tot exempel van lijdtsaemheydt, Godt wil u lijden wenden Al tot een saligh enden. Na beter.
Cookies on Poetry Cove