Na de wijse: Van den vijfden Psalm.
GOds gracy seghen en goetheden
Wensch ick de Bruydegom en Bruyt,
De Heer gheleydt u in en uyt
Nae sijn liefste wil en seden,
In liefd' en vreden.
V Bruylofts feest wilt nu hanteren
Godtvruchtelijck met lof en deught,
Gheneuchelijck en soet met vreught,
Op dat u Bruylofts converseeren
Is tot Godts eeren.
Die u als sjn lief kinders kleyne
In't huwelijck nu heeft ghepaert,
Weldadelijck van goeder aert,
Leeft met malkanderen ghemeyne
Suyver en reyne.
Soo sal Godt sijn seghen uytgieten
Over u altijdt meer en meer,
En u volstercken in sijn leer,
Ghelucksalighe kindren ghenieten,
Sonder verdrieten.
V liefd' en toegheneyght ghemoeden,
Met trou en beloften vervaet,
Tot een Chrijst'lijcke echte staet,
Wil u de Heere in behoeden,
Ende opvoeden.
In deughden ende goede seden,
Tot blijtschap van u ouders goet,
En eere van het naeste bloet,
Die Heere geef u sijnen vreeden,
En saligheden.
Na beter.