Na de wijse: Help Godt my mach ghelinghen. ALs Christus was verresen Van der doot lief en waert, Veertigh daghen na desen, Soo was sijn Hemel-vaert Afghebeeldet, al met Henoch, Die Godt heeft opghenomen, Wt des werelts bedrogh. Elias is ghevaren,
Met een waghen als vyer, Sijnde Engelsche Scharen, Ten Hemel goedertier. Vaert op met juychen wort gheseyt, Tot Christum onsen Heere, Heyl ende salicheyt. Niemant sal ten Hemel climmen Dan die ghecomen is Vanden Hemel, sonder grimmen, Wt enckel liefd' ghewis, Ghy sult des menschen Sone ras, Nu wel haest sien opvaren, Daer hy alereerst was. Met veel meer ander woorden, Soo heeft Christus voor seght, Dat sijn Discipulen hoorden, Van sijn Hemel-vaert recht, Die nae sijns doots en verrijsenis, Eerstelijck soude gheschieden, Dit waren sy ghewis. Doch eer dat hy verscheyde, Toe seydt hy haer den gheest, Die haer recht soude lyden In der waerheyt, men leest Dat hy gaf veel leeringhe jent,
Hoe sy souden huys houden Nae 't laetste Testament. Doen is hy op ghenomen Voor haer ooghen van daen, Maer hy sal weder comen Nae d'Enghelen vermaen, Hy sit al tot die rechterhandt Van sijn Hemelschen Vader, Een Voor-bidder, Heylandt. Hy is voor heen ghetrocken Ons te bereden daer Een stee, tot ons ghelocken, By der Enghelen schaer, Want als hy weder comen sal, Soo sal hy tot hem nemen Den gheloovighen al. Hy sal ons zeyl-steen wesen, Ons optrecken met spoet, In die wolcken ghepresen, Den Heere te ghemoet, En sullen eeuwigh by hem sijn, Troost u met dese woorden Spreeckt den Apostel fijn. Dus hebben wy te leeren Wt Christi Hemel-vaert,
Het Hemels te begeeren, En niet het aerts onwaert, Ons nietigh lichaem onbequaem, Sal hy als dan verclaren, Als sijn eyghen lichaem. Hier toe wilt ons Heer geven Vwen heylighen gheest, Dat hy regeert ons leven En voert ons in die feest Van Christo uwen lieve Soon, Met hem te triumpheeren Eeuwigh in 's Hemels troon. Na beter.
Cookies on Poetry Cove