Na de wijse: Nachtegael in't wilde. Ofte, Mijn afscheydt, moet ick maken.
BLoeyende jeucht eerbare
In 't hof Christi gheplant,
Die schoone nieuwe mare
Van Christus ons Heylandt,
Mensch ick u al te gare
Tot een Nieuwe Iaer cant.
In Christo sal beginnen
'Tnieuwe Iaer met ootmoet,
Besnijdt u hert en sinnen
In sijn besnijdingh' goet,
Dat gheef u Godt uyt minnen
Tot een Nieuwe Iaer soet.
Vernieut in hem u leven,
Weest vruchtbaer in den gheest,
Vruchten des gheests verheven
Laet blijcken alder meest,
Dat wil u die Heer gheven
Tot een Nieuwe Iaers Feest.
Desen Feest wilt verchieren
Met mayen groen en schoon,
Van deucht en goe manieren
Des heylighen Gheests loon,
Die Heer wil u regieren
Tot een Nieuwe Iaers Kroon
Het is een Kroon der eeren,
Lieffelijck soet met min,
In't Hof Christi spanceeren,
Met een gheest'lijcke sin,
Dat gun u God die Heere
Tot een nieuwe Iaer in.
Christus Iesus ghepresen
Een nieuwe creatuer,
Een nieu gheestelijck wesen
Ghelt alleen dese uer,
Met Christo sijn verresen
Tot een nieuwe Iaer puer.
Puer, suyver ende reyne
Leyt u leven, acht niet
Swerels glori en pleyne,
Die lust der jonckheydt vliedt
Dit wensche ick u ghemeyne
Tot een nieuwe Iaers Liedt.
Na beter