Na de wijse: Van den 116. Psalm.
SPijs ende dranck comt van den Heere goet,
Waer door hy ons wil voeden ende spijsen,
Daerom soo wilt Godt loven ende prijsen,
Eert en looft hem met hert, sin en ghemoedt.
Alle spijse die Godt gheschapen heeft,
Daer de menschen naturelijck by leven,
Sijn reyn end' den gheloovighen ghegheven
Te ghebruycken met danckbaerheydt beleeft:
Want sy wort heylight door't woort en gebedt
Waerom al eer wy spijsen ons lichame,
Soo laet ons nu dancken des Heeren name,
Voor al het geen dat ons wordt voorgheset.
Eten en drincken tot nootdruft en vreugth,
Met spijs en dranck het lichaem niet beswaren,
Maer alle Godts gaven spijse en waren
Ghebruycken tot lof, eere ende deught.
Na beter.