4. Bias van Prienen.
Op aerd is gheen adelder schat,
Dan die een goe conscientie hadt,
'Tgrootste ongheluck datter can,
Een mensch op aerden comen an,
Is dese, dat door menigh list,
Die een des anders duyvel is.
Wie ghenoegh heeft, gheen meer begeert,
Die magh goet zijn, en rijck op eerdt,
Hier teghen seer arm eenighe zy,
Die meerder begeert t'alder ty
Het is een vroom rechtschapen hart
Welck of hy wel, mocht yemant smart
Toevoeghen met groot ongheluck,
Ende bruyckt, gantsch, gaer, geen ergh stuck,
Daer teghen ist een seer boos man,
Die geeren yemant schaedt doet an,
Soo het hem slechts quam voor die voet,
Alst menigh den Godlosen doet.
Wat weldaet ghy ontfanght in't goe,
Schrijft Godt den Schepper 't alleen toe,
Hoe sterck en jonck u leven lust,
Denckt dat ghy op het outaer rust,
Hier schort wel veel, maer denckt daer aen,
Ghy moet eens van u neeringh gaen.
Kuysheyt en tucht behoudet braef,
Voor uwen hooghste morgen gaef,
Die deughden eert, laetse met een,
Cost'lijcker zijn, dan edel steen,
Gout Silver, Edel steent vergaen,
Tucht, kunst, en deught, blijft eeuwigh staen.