Cupidon à la Ieunesse.
Tout ce que nous voyons dans ces quatre elements
Reçoit du bon du coeur mes beaux commandements.
En terre les brutaux sont tous de ceste bande,
Tout aussi bien que ceux que la raison commande,
Les oyseaux dedans l'air, les poissons en la mer,
Sçavent tous ce que c'est de ce doux mal d'aimer.
La Salamandre aussi sent ce feu dans sa flamme.
Le Soleil, & la Lune au ciel d'homme & de femme
Portent les vrais pourtraits, ils se vont entre veoir
Et par leur jointe icy se vient à concevoir,
Et naistre toute chose, & en prend nourriture
Arbres, herbes, metaux, voire la pierre dure,
Veufs de vie, & d'esprit, & de sens despourveux,
Or qu' en terre cachez, ne sont francs de mes feux.