Dv edele Fonteyn mit Ruh vnd Lust vmbgeben
Mit Bergen hier vnd dar als einer Burg vmbringt
Printz aller schönen Quell auß welchem Wasser dringt
Anmütiger dann Milch vnd köstlicher dann Reben
Da vnsers Landes Kron vnd Haupt mit seinem Leben
Der werden Nymf offt selbst die Zeit in frewd zubringt
Da jhr manch Vögelein zu ehren lieblich singt
Da nur ergetzligkeit vnd keusche Wollust schweben
Vergeblich bistu nicht in diesem grünen Thal
Von Klippen vnd Gebirg beschlossen vberal
Die künstliche Natur hat darumb dich vmbfangen
Mit Felsen vnd Gebüsch auff daß man wissen soll
Daß alle Fröligkeit sey Müh vnd arbeit voll
Vnd daß auch nichts so schön es sey schwer zu erlangen.