Ihr Honigvögelein die jhr von den Violen
Vnd Rosen abgemeit den wundersüssen Safft
Die jhr dem grünen Klee entzogen seine Krafft
Die jhr das schöne Feldt so offt vnd viel bestohlen
Ihr Feldt einwohnerin was wollet jhr doch holen
Das so euch noch zur Zeit hat wenig nutz geschafft
Weil jhr mit Dienstbarkeit deß Menschen seit behafft
Vnd jhnen mehrentheils das Honig müsset Zollen?
Kompt kompt zu meinem Lieb auff jhren Rosenmundt
Der mir mein kranckes Hertz gantz jnniglich verwundt
Da solt jhr Himmelspeiß vnd vberflüssig brechen:
Wann aber jemandt ja sich vnderstehen kundt
Ihr vbel anzuthun dem sollet jhr zur stundt
Für Honig Galle sein vnd jhn zu tode stechen.