So offt ich ewren Glantz jhr hellen äuglein schawe
Empfindt ich bey mir selbst so grosse Lust vnd Freudt
Daß ich mich frewen muß auch in Trübseligkeit
Vnd eusserster Fortun in dem ich auff euch bawe
Hergegen schätz ich mich für die betrübtste Frawe
Wann jhr nicht wie zuvor geneigt vnd freundlich seyt
Ich bin mir selber gramm mein Leben ist mir leydt
Weil ich von euch gehaßt auff die ich einig trawe.
Ihr jrrdisches Gestirn jhr sterblichen Planeten
Ihr meine Sonn vnd Mond die jhr mich könnet tödten;
Ohn euch ist alle Lust nichts als ein blosses bildt
Was wundert jhr euch dann daß ich zu euch muß eilen
Mein Zuversicht? Es fleucht ein jeder für den Pfeilen
Deß Todes wider die jhr seyt mein starcker Schildt.