Weil mein Verhengniß wil vndt lest mir nicht das glücke
Bey dir mein Augen trost zue leben nur allein
So giebet zwar mein sinn sich mitt gedult darein
Doch sehnt vndt wündtschet er auch stündtlich sich zuerücke.
Es ist ja lauter nichts wo diese schöne blicke
Diß liecht das mich verblendt des güldnen haares schein
Das mein gemüte bindt diß lachen nicht kan sein
Der mundt vndt alles das wormit ich mich erquicke.
Die Sonne macht mir kalt der tag verfinstert mich;
Ich geh' vndt weiß nicht wie; ich geh'vndt suche dich
Wohin du nie gedenckst. was macht mein trewes lieben?
Ich seh' vndt finde nichts; der mangel deiner ziehr
Hatt alles weggeraubt: zwey dinge sindt noch hier:
Das elendt nur vndt ich der ich darein vertrieben.