Da un esercito estremo circondà
De bellezze, de grazie e lezadrìe,
A mille assalti, a mille battarìe,
Me ho tegnuo, mare mia, per fin a qua.
Ma brussà tutto quanto e smantellà
Da sguardi che puol pi che artellarìe,
Èccome reso e con i ferri ai pìe
In man della medema crudeltà.
Cussì diseva Amor, ch'el sentì mi,
E intanto i sassi e 'l ciel da compassion
E 'l proprio inferno pianzeva quel dì.
Se la mia donna un dio tien per preson
E lo tormenta, che sarà de mi?
O dura e lagremosa conclusion!