Culù che per servir crede a custìa
Cavarghe da le man qualche favor,
El no sa se 'l canal habia saor,
Se la Luna sta ferma o 'l Sol va via.
Questa, che propria xe la bizaria,
La minera dei sesti e de l'humor,
Darà per servitù, per versi, Amor?
La ghe darà 'l malan che Dio ghe dia.
E mi son sì balordo, e sì buffon,
Che al despetto d'ogn'un vago corrando
Dove sta la desgratia in zenocchion.
E no me accorzo che, viver amando
Sta donna, si xe giusto a condition
Di chi per arricchir vive stentando.