Haveva el cuor tra l'alegrezza e 'l riso
Quando soleva inanzi andar de fuora,
E quando che tornava in mia mal'hora
Me pareva partir dal paradiso.
Adesso mo, che son via da quel viso,
Che me mette su 'l cao la dalaora,
Maledisso dolente el ponto e l'hora
Che me ha da tanto ben, gramo, diviso.
Za l'acque me pareva de crestal,
I campi, che ridesse, e la Natura
Me fesse inanzi i occhi un carneval.
Adesso tòrbia me par l'acqua e scura,
E vedo zò che vedo per mio mal
Senza la cara anzelica figura.