Zonto alla natural mia impatientia,
Fatta per l'uso al cuor piaga fondìa,
E alla mia singular poltronaria
Che ha per massera la mia diligentia,
Ho per gratia del ciel tal influentia
Che certo altri che mi se appicherìa,
Che ogni pianetto per so cortesia
Me ha qualche puoco de malevolentia.
Mi, che se vedo urtar un sasso a un can,
Fazzo a mità con esso del dolor,
Che per lu maledisso quella man,
Se me vògio cavar qualche mio humor,
El diavol, del mio dano vardian,
Tàgia el dessegno e me spartisse el cuor.