Madonna, son un homo tanto schietto,
Che in do una concludo i mie marcai,
Vegno alle brazze strette sempre mai,
O che me intrigo o che me parto netto.
Quando fazzo l'amor, mai no me metto
In lumi falsi e in scurzi artificiai,
Per infrizar, co' suol far sti annegai
Che ha da ogni hora el Petrarca in tel braghetto.
El mio parlar xe assae pi che vulgar,
Chiaro, familiar, basso e spedìo.
Co' xe sto essempio, ve vorrìa chiavar.
No ve pàsselo el cuor, caro ben mio?
No ve sentìu commòver e sforzar,
Senza el guari, el quotamque, el testè e l'io?