Seben ho in vuodo de no far mai pi,
Che l'altra volta me chiavì a mie spese,
Za che ti no sè pi sì descortese,
Me tornarave a innamorar de ti.
Varda s'ti vuol mo innamorarte in mi,
Che anca se ti no vuol, netto el paese,
Pur te si deventà così cortese
Che spiero in Dio che ti dirà de sì.
Lassemo tutto quel che xe passà,
No stemo a raccordar pi morti a tola,
E galdémose in pase, in carità.
Perché s'havesse detto mai parola
Per la qual ti te fossi inscorozzà,
Me mente per le cane della golla.