43

No me cassé, madonna, per un petto Dal vostro Amor, perché s'el m'è scampà Vu sè sta causa perché m'ho sbassà Per torve su da terra el fazzoletto.

Sarave ben d'Amor duro decretto Questo, s'un per un altro fa un peccà, Che 'l vegnisse de longo castigà Da culù proprio de chi xe el diffetto.

L'ho tratto e sì el confesso largamente Perché anzi vògio che de qua cavé Quanto el mio Amor d'ogn'altro è pi fervente. Podeva mi star saldo e dir: Vardé,

Madonna, el fazzoletto è tra la zente, O buttàrvel davanti con un piè? Ma el mio voler, che xe Da servir, co se dise, de buon cuor

Se me fece cascar in quel error. Donca se per Amor Vostro son corso subito a staffetta Vu vorré addesso darme la paletta?

Sta via no xe la dretta Da far che 'l mondo sempre possa dir Che no xe morto al premio el bon servir. Vu me possé mo dir

C'intendo che havé ditto a pi de otto Che no volé un moroso pettizotto. O Dio, sarìa mai sotto Sta disgracia nassuo, ch'è per un fiao

De vento schietto e no contaminao? Ma tolél desperao, Se no ghe xe fettor, ma nome el tiro No se puolo chiamar anca un sospiro?

Qua mi no me retiro Da la rason, vorrìa che fosse eletti Zùdesi a sti accidenti, dei perfetti, Perché so che costretti

I sarrìa in mio favor per il dover, Ma vu, Madonna, vu che havì poder, Metté sul tavolier Della consientia tutte ste rason,

E daspuò giudicheme bello e bon, Con patto e condicion Se a vu ve par cusì, che come traga Più petti, che de longo me ne vaga,

E quando, che la staga Qua, mi de longo sottoscrivarò D'esser cassà se mi contrafarò. Ma se vu vorré po

De fatto in fin che sia bandì da vu, Me son resolto de no viver più. Farò chiamar culù Che intàgia ben in arte de scultura,

Che scrivarà su la mia sepoltura Sta mia desaventura: Qua zasse uno che per trar un petto La so donna el fè andar entro a un cailetto.