Ho quel serpente della zelosia
Che m'ha sparso in le vene el so venen,
Che se vedo un osel sora el mio ben
Temo che in fina lu mel porta via.
Amor mo, che vuol darmela compìa,
Fa che in insonio subito me vien
Custìa davanti, e che la vedo in sen
Da zente apponto che scortegarìa.
Me par vederla in brazzo a questo e quello,
Non che po a miei rivali, a i miei nimighi,
Che galde del so ben, del mio martello.
Non basta che, vogiando, ho tanti intrighi,
No basta che custìa non ha cervello,
Che ho per zonta, a dormir, de sti castighi.