Mi che la darìa marza a un zarattan,
Che ho dà le romancine che se sa,
Che m'ha sentìo, non solo quei de ca',
Ma la zente d'attorno un mio lontan,
E che addesso non habbia per le man
Do zanze mi, meschin desgratià,
Che m'haverìa più presto immaginà
Che me mancasse mille volte el pan.
Questi xe dei miracoli d'Amor:
Deventar muto innanzi del suo ben,
E parer da so posta un orator.
Se no ho parole al mal, co se convien,
Ve podé ben pensar co stà el mio cuor,
Ben mio, se m'havé messo el fuogo in sen.