Havarìa messo pegno mio fradel
De no m'haver da innamorar mai pi,
Ma no ho mai credù, misero mi,
Che fusse in terra un anzolo pi bel.
Ma veder un musìn d'un puerel
In su la primavera dei so dì,
Che ha tanti fiori de belezza in si
Quanti mai desse a tutte l'altre el ciel,
Sentir parole da fermar el sol,
Trovar gratia e costumi senza par,
Ma qual lion no se farìa un cagnuol?
Mai bramo pi de no m'innamorar,
Che d'un giazzo ardo tutto, e sì me duol
De no haver cento cuori da brusar.