Se da rabbia, cuor mio, e da martello,
Digo alle volte quel che no vorrìa,
L'è che vien in amor tal frenesia
Che vasta cusì el cuor come el cervello.
Se no ardesse per vu, musìn mio bello,
Se stasse ben, no me lamentarìa,
Savé ben co volé, colonna mia,
Se me fé deventar humil agnello.
Perdoné qualche volta al mio dolor,
Se el ne fa desperar più che no vòggio,
Che no son mi, l'è el spirito d'Amor.
Dio sa se son po gramo, e se me dògio,
E se me afflizze mortalmente el cuor
El vostro sdegno pi che el mio cordòggio.